Հայ մարզիկների փետրվարյան պատվաբեր ու մեդալաբեր ելույթների շարքում մեծ գնահատականի են արժանի Հայաստանի աթլետիկայի հավաքականի առաջատար վազորդ Երվանդ Մկրտչյանի ելույթները: Հայ մարզիկը նախ լուրջ հաջողություն գրանցեց Ստամբուլում՝ դառնալով հաղթող 1500 մետր վազքատարածությունում Բալկանյան երկրների ձմեռային առաջնությունում, այնուհետև՝ Բելգրադի փակ մարզասրահում կայացած Belgrade Indoor Meeting 2024 մրցաշարում արծաթե մեդալ նվաճեց: Երվանդ Մկրտչյանը 1500 մետր վազքատարածությունը հաղթահարեց 3։38.12 րոպեում, ինչն անկախ Հայաստանի ամենաբարձր արդյունքն է աթլետիկայում։ Հիրավի, մեծ ու նշանակալի ձեռքբերում:
Անկախի հետ զրույցում հայ մարզիկը կիսվում է տպավորություններով՝ նշելով, որ, անկախ դժվարություններից, ցանկության դեպքում հնարավոր է հասնել արդյունքի:
-Շնորհավորում ենք, տարվա հաջող մեկնարկների, միջազգային 2 կարևոր ստուգատեսում կարևոր ու նշանակալի ձեռքբերումների, մեդալներ նվաճելու կապակցությամբ:
-Շնորհակալ եմ: Իհարկե շատ մեծ են տպավորություններս՝ պայմանավորված վերջին 2 վազքով:
Ճիշտ է,անցել եմ դժվար ճանապարհ՝ հատկապես այս տարի, քանի որ եղանակային պայմանները այդքան էլ լավ չէին: Գյումրիում, ինչպես գիտեք, չկա փակ վազքուղիներով մարզվելու վայր: Այդ իսկ պատճառով պարապմունքներս անցկացնում եմ միյան դրսում՝ «Շիրակ» ստադիոնում, բայց հարմարվել եմ արդեն ու հիմա, Աստծո կամոք, կարող եմ ասել, որ ուղղակի նպատակ է պետք և աշխատասիրություն, մնացածն ինձ թվում է՝ երկրորդական է: Պայմանների առկայության դեպքում հաստատ շատ ավելին կլինի, բայց ունենք այն, ինչ կա...
-Ձեր ելույթների մասին ի՞նչ կասեք:
Ստամբուլում Բալկանյան երկրների առաջնությանը գրավել եմ 1-ին տեղը 3.44.55 արդյունքով: Առաջին վազքիս համար շատ գոհ էի, ամեն ինչ ստացվեց այնպես, ոնց նախապես պլանավորել էինք մարզչիս հետ ու հաղթեցի:
Դրանից 2 օր հետո Սերբիայում մասնակցեցի Belgrade indoor Meeting միջազգաին մրցաշարի: Այնտեղ վազեցի 1500մ 3.38.12 վայրկյան՝ գրավելով 2-րդ տեղը: Ճիշտ է, տեղն այդքան էլ կարևոր չէր այս մրցմանը, քանի որ նպատակս միայն բարձր արդյունք ցուց տալն էր: Այդպես էլ եղավ: Գրանցեցի բարձր արդյունք, չասեմ որ անակնկալ էր, որովհետև շատ եմ տանջվում մարզչիս՝ Գևորգ Բարսեղյանի գլխավորությամբ, ինչն իր արդյունքը տվեց:
-Առաջիկա ծրագրերից կխոսե՞ք:
-Չեմ սահմանափակվելու: Մարտի 1-3-ը Գլազգոյում կայանալու է աշխարհի առաջնությունը: Այնտեղ ևս պետք է ամեն ինչ անեմ, որ կարողանամ մասնակցել եզրափակչի վազքին: Դժվար է լինելու, բայց փորձելու եմ ներկայանալ իմ ուժերի չափից ավել: 2 շաբաթ ունեմ հավաքվելու ու պատրաստվելու, ամենակարևորը, որ վնասվածք չստանամ:
